Gjykata e Apelit e Juridiksionit të Përgjithshëm ka vendosur të lërë në fuqi dënimin me 30 vite burg për Agron Tufën, i akuzuar për vrasjen e Kejsi Hysës. Sipas hetimeve, Tufa dyshohet se ka vrarë dhe më pas groposur viktimën pranë varrezave të lagjes.
Ngjarja daton në vitin 2018, kur babai i Kejsi Hysës raportoi në polici zhdukjen e të birit. Hetimet çuan në arrestimin e një personi tjetër, i cili dëshmoi se krimi ishte kryer në bashkëpunim me Agron Tufën. Në mungesë të tij, Gjykata e Krujës e shpalli fajtor dhe e dënoi me 30 vite burg për akuzat e “Vrasjes me dashje”, “Mbajtjes pa leje të armëve dhe municionit” dhe “Fshehjes ose asgjësimit të kufomës”.
Pas arratisjes, Tufa u arrestua nga autoritetet italiane më 6 janar 2024 dhe u ekstradua në Shqipëri më 13 shtator 2024. Ai kërkoi rihapjen e afatit për apelim dhe më 10 dhjetor 2024, Gjykata e Tiranës e lejoi që të apelonte vendimin e vitit 2021.
Gjykata e Apelit shqyrtoi kërkesën e tij për prishjen e vendimit dhe rigjykim me një trup gjykues të ri, por sot, më 25 shkurt 2025, vendosi të rrëzojë kërkesën dhe të lërë në fuqi dënimin me 30 vite burg.
