Një aeroplan i American Airlines i nisur nga aeroporti JFK në New York drejt Delhit është detyruar të devijojë në Romë, duke u shoqëruar nga avionë luftarakë pas një kërcënimi me bombë në bord, sipas raportimeve.
Fluturimi AA292 bëri një kthesë të menjëhershme pranë Turkmenistanit të dielën për shkak të një "çështjeje të mundshme sigurie", konfirmoi kompania ajrore.
"Siguria dhe mbrojtja e pasagjerëve janë prioritetet tona kryesore dhe falënderojmë klientët tanë për mirëkuptimin e tyre," thuhet në deklaratën e American Airlines. Kompania njoftoi gjithashtu se po bashkëpunon me autoritetet përkatëse dhe do të ofrojë përditësime mbi situatën.
Sipas faqes së ndjekjes së fluturimeve, FlightRadar24, shkaku i devijimit ishte një kërcënim me bombë.
Pamjet në rrjetet sociale treguan avionin Boeing 787-9 Dreamliner të shoqëruar nga dy avionë luftarakë Eurofighter Typhoon të Forcave Ajrore Italiane.
Fluturimi ishte nisur nga aeroporti JFK rreth orës 2:30 të mëngjesit të sotëm me destinacion Indinë dhe u ul në Romë rreth orës 17:00.
Ky incident vjen disa javë pasi një tjetër fluturim i American Airlines u evakuua në Teksas dhe u vonua për pesë orë për shkak të një pasagjeri që kishte vendosur një emër të frikshëm për hotspot-in e tij Wi-Fi: "Ka një bombë në fluturim."
