Një tragjedi ka tronditur komunitetin shqiptar, pasi një 19-vjeçar nga Kamza, Aurel Elezi, humbi jetën në Santorini pas shembjes së papritur të çatisë që po riparonte.
Aurel Elezi, i cili ishte jetim, kishte shkuar në Greqi për të punuar dhe për të ndërtuar një të ardhme më të mirë për veten. Historia e tij prekëse rrëfehet nga Sabail Gjyni, miku i jetimores ku u rrit i riu.
Sipas Gjynit, Aurel u braktis nga nëna e tij në moshën 9-vjeçare, pasi ajo u martua në Bosnjë me një burrë tjetër. I ati, i papunë dhe i dhënë pas pijes, nuk mundi të kujdesej për të. Falë ndihmës së disa komshinjve, Aurel u dërgua në një shoqatë turke bamirësie, ku u rrit dhe u arsimua deri në klasën e nëntë. Pavarësisht sfidave të jetës, ai nuk hoqi dorë nga ëndrra për një të ardhme më të mirë, por fatkeqësisht, jeta e tij u ndërpre tragjikisht.
