Autoritetet greke kanë akuzuar Shqipërinë për “vjedhjen” e liqenit të Gramozit, një nga liqenet akullnajore më të mëdha në Ballkan, duke pretenduar se ai është pjesë e territorit grek. Debati ka lindur pas ndryshimeve të kufirit të pasqyruara në Google Maps, ku liqeni figuron tani pjesërisht në Shqipëri. Sipas pretendimeve greke, ky ndryshim ka ardhur si rezultat i lëvizjes së piramidave kufitare nga pala shqiptare, çka ata e konsiderojnë një “vjedhje territoriale”.
Liqeni i Gramozit, i njohur edhe si liqeni i Beznjas, ndodhet në Malin e Gramozit, në një lartësi prej 2,350 metrash mbi nivelin e detit dhe është një destinacion natyror me rëndësi për të dyja vendet. Reagimi grek ka çuar në kërkesën për ndërhyrjen e Google, e cila ka modifikuar hartën duke ndarë liqenin mes dy vendeve. Megjithatë, autoritetet greke, përfshirë kryebashkiakun e Nestorios në Kastoria, Christos Gkosliopoulos, vazhdojnë të kundërshtojnë këtë vendim, duke kërkuar që liqeni të mbetet plotësisht në territorin grek.
Kjo ngjarje ka shkaktuar një debat të gjerë mbi pasigurinë e kufijve mes Shqipërisë dhe Greqisë, duke ngritur pyetje mbi ndikimin e teknologjive dhe platformave si Google Maps në përcaktimin e territoreve shtetërore. Wikipedia ka reflektuar këtë paqartësi duke krijuar dy versione të ndryshme për liqenin: një që e konsideron grek dhe një tjetër që e vendos në zonën e Kolonjës, në Shqipëri. Situata pritet të zhvillohet më tej dhe mund të ndikojë në marrëdhëniet mes dy vendeve.
