Modelet e Inteligjencës Artificiale të kompanisë kineze DeepSeek po sfidojnë rivalët amerikanë me kosto më të ulët dhe performancë pothuajse të barabartë, shkruan The Economist.
Prezantimi i modelit të arsyetimit O1 nga OpenAI në shtator 2024 nxiti një garë të shpejtë mes kompanive të mëdha të teknologjisë. Google publikoi modelin “Gemini Flash Thinking”, ndërsa OpenAI u përgjigj me O3. Megjithatë, Alibaba dhe DeepSeek ishin ndër të parët që imituan qasjen e OpenAI.
DeepSeek jo vetëm që paraqiti modelin e tij të arsyetimit R1, por në dhjetor 2024 publikoi edhe një model të madh gjuhësor, V3, me 685 miliardë parametra, më i avancuar se shumica e homologëve perëndimorë. Sipas matjeve, ai tejkalon të gjithë rivalët, përveç modelit origjinal O1 të OpenAI.
Pavarësisht sanksioneve amerikane kundër industrisë kineze të çipave dhe Inteligjencës Artificiale, kompanitë kineze po arrijnë të konkurrojnë në nivele të larta. Autoritetet kineze, ndonëse me rregulla të forta mbi përmbajtjen, po inkurajojnë zhvillimin inovativ të AI-së.
DeepSeek, që fillimisht nisi si një fond mbrojtës për tregtimin e aksioneve, tani synon të zhvillojë AI për të mirën publike, duke ndjekur modelin e OpenAI dhe duke sfiduar dominimin amerikan në këtë fushë.
