Gazeta britanike The Times ka zbuluar përmes një investigimi mënyrat e reja që shqiptarët po përdorin për të hyrë ilegalisht në Mbretërinë e Bashkuar. Megjithëse Shqipëria konsiderohet një vend i sigurt dhe qytetarët e saj nuk kanë të drejtë të kërkojnë azil, trafikantët po shfrytëzojnë metoda të reja, duke preferuar transportin me kamionë nga Belgjika për një çmim deri në 23,000 paund për person.
TikTok përdoret gjerësisht për të reklamuar këto rrugë, duke përfshirë imazhe të Eurotunnel-it, kamionëve dhe pasaportave greke të falsifikuara. Trafikantët ofrojnë opsione si kalimi me tren në Eurotunnel për 40-50 minuta, udhëtimi me gomone për 3,000 paund, apo blerja e një pasaporte greke me gjurmë gishtash për një tarifë të ndryshueshme.
Pavarësisht uljes së numrit të shqiptarëve që kalojnë Kanalin me varka – nga 12,024 në vitin 2022 në vetëm 924 në vitin 2023 – emigracioni ilegal vazhdon, duke iu atribuar marrëveshjes mes Shqipërisë dhe MB për kthimin e shpejtë të emigrantëve. Ndërmjetës shqiptarë rekrutojnë klientë, ndërsa rrjetet kriminale operojnë në Gjermani, Belgjikë dhe Francë për të organizuar kalimet.
Qeveria britanike ka ndërmarrë masa për të luftuar këtë fenomen, duke bashkëpunuar me autoritetet shqiptare dhe duke shtuar kontrollet në mediat sociale për të ndaluar reklamimin e kalimeve të paligjshme.
