Të dhënat e fundit nga Instituti i Statistikave tregojnë se shqiptarët po prodhojnë gjithnjë e më pak, duke zgjedhur rrugën ‘më të thjeshtë’ të biznesit, atë të shitblerjes, shërbimeve, mikpritjes, akomodimit ose ndërtimit.
Megjithëse ekspertët përpiqen ta justifikojnë këtë me tendencat e zhvillimit ekonomik ose me “rritjen në përgjithësi të numrit të bizneseve”, në terma afatgjatë kjo sjell varësi nga tregu i jashtëm dhe nga politika për të cilat këta tregtarë nuk mund të vendosin.
Të dhënat nga INSTAT tregojnë se numri ndërmarrjeve aktive është shtuar me rreth 4 mijë apo 3.4% në harkun e 12 muajve, kryesisht biznese të vogla dhe të mesme.
Këto sipërmarrje kanë pak të punësuar dhe nuk mund të plotësojnë xhiron e aktivitetit kombëtar ekonomik, ndërsa dhe tendenca e të ardhmes afatshkurtër fokusohet te fusha e teknologjisë së informacionit, sipas rekomandimeve të qeverisë.
Ndërkohë fermerët dhe prodhues të tjerë të ushqimit janë parë shpesh në protestat për vështirësitë që hasin në aktivitetin e tyre prodhues.
Të dhënat nga INSTAT tregojnë se në total janë 560 mijë individë të punësuar në ndërmarrjet vendase, shifër kjo 2.2% më e lartë se një vit më parë.
