Autori i plagosjes me armë zjarri ndaj 29-vjeçarit Elvis Halilaj në Kukës është dorëzuar në polici.
Fillimisht u raportua se Zenel Muçmata, zyrtari i bashkisë, i identifikuar si kushëriri i kryebashkiakut Albert Halilaj, kishte qëlluar me armë, por më pas ngjarja mori një tjetër rrjedhë.
Autorësinë e kësaj ngjarje e ka marrë vëllai i tij, 25-vjeçari Sebastian Muçmata, i cili është dorëzuar vetë në polici mëngjesin e sotëm. Ai ka pasur me vete edhe armën e përdorur për krimin.
Muçmata ka dhënë një version tjetër të ngjarjes gjatë marrjes në pyetje, duke pohuar se Elvis Halilaj e kishte kërcënuar babanë e tij, dhe për këtë arsye ai e ndoqi dhe e qëlloi disa herë me pistoletë, teksa Halilaj dilte nga makina, pranë shtëpisë së tij.
Policia e Kukësit dhe Prokuroria kanë nisur hetimet për zbardhjen e plotë të ngjarjes.
