Furgoni i linjës ndërkombëtare Berat – Zakynthos është kapur nga policia greke me një sasi lënde narkotike, konkretisht kokainë.
Sipas Departamentit të Narkotikëve në Patras, autoritetet kishin siguruar informacione dhe prova që çuan në lokalizimin e dy të dyshuarve në Rio. Aty, një shtetas shqiptar i dorëzoi dy çanta një shtetasi grek, pas së cilës të dy u larguan me automjete në drejtime të ndryshme.
Policia ndërhyri menjëherë, duke i ndaluar të dyshuarit dhe duke kryer kontrolle. Tek shtetasi grek u gjetën dhe sekuestruan tre pako me 159.3 gramë kokainë, ndërsa tek shqiptari u zbulua një pako me 1 kg e 44 gramë kokainë, një telefon celular dhe 6,445 euro.
Hetimet zbuluan se 159.3 gramët e kokainës ishin fshehur në një pako detergjenti lavanderie, ndërsa 1044 gramët e tjera u gjetën në kabinën e furgonit, që drejtohej nga shtetasi shqiptar. Ky mjet rezulton të jetë furgoni i linjës Berat – Zakynthos. Përveç shoferit, policia ndaloi edhe pasagjerët, të cilët u lanë të lirë pas verifikimeve.
