Një balenë gëlltiti për pak sekonda një varkëtar në ujërat e Patagonisë kiliane, për ta nxjerrë më pas të padëmtuar.
Skena e frikshme, e filmuar nga babai i tij, u bë menjëherë virale në rrjet.
Të shtunën e kaluar, Adrián Simancas po lundronte me varkë së bashku me babanë e tij, Dell, në Bahía El Águila, pranë Farit San Isidro në Ngushticën e Magelanit, kur papritur një balenë u shfaq nga uji dhe e 'përpiu' atë bashkë me kajakun e tij të verdhë.
Dell, i cili ndodhej vetëm disa metra larg, filmoi momentin dramatik duke e këshilluar të birin të ruante qetësinë.
“Mendova se isha i vdekur! Isha i bindur se më kishte ngrënë, se më kishte gëlltitur," tha Adrián për Associated Press. Ai përshkroi tmerrin që përjetoi në ato pak sekonda dhe frikën që e kaploi pas daljes në sipërfaqe, duke u shqetësuar për sigurinë e të atit dhe rrezikun nga temperaturat e ulëta të ujit.
Pavarësisht momentit të frikshëm, Adrián arriti të notonte deri tek varka e babait të tij, i cili e ndihmoi të ngjitej përsëri në mjetin lundrues. Fatmirësisht, të dy arritën në breg pa lëndime.
Ngushtica e Magelanit, e vendosur rreth 1600 milje në jug të kryeqytetit të Kilit, Santiagos, është një destinacion i njohur turistik në Patagoninë kiliane. Por temperaturat e ftohta të ujit, që mund të zbresin deri në 4°C, përbëjnë një rrezik të madh për lundruesit dhe eksploruesit.
Ndërsa sulmet e balenave ndaj njerëzve janë jashtëzakonisht të rralla, incidentet me përplasje të anijeve me balena janë shtuar vitet e fundit. Në raste të tjera të ngjashme, në 2020 dy gra në Kaliforni u goditën nga një balenë, por shpëtuan pa lëndime të rënda.
Ngjarja e fundit në Kili mbetet një kujtesë e fuqisë së natyrës dhe e rreziqeve që mund të shfaqen në ujërat e hapura.
