Dhjetëra mijë belgë dolën në rrugë të enjten për të protestuar kundër reformave të reja të pensioneve të qeverisë, në ditën e parë të një greve disa-ditore që paralizoi të gjithë trafikun ajror në vend.
Policia lokale raportoi në rrjetin social X se rreth 60,000 persona u bashkuan në grevë në Bruksel. Përplasjet mes protestuesve dhe policisë ndodhën pranë selisë së partisë liberale qendrore të djathtë MR, e cila është pjesë e koalicionit qeverisës.
Policia përdori gaz lotsjellës dhe ujë me presion për të shpërndarë turmat. Përplasje të ngjashme u raportuan edhe pranë selisë së një partie tjetër të koalicionit, Les Engages, e cila ka prirje demokristiane.
Raportohet se disa protestues hodhën fishekzjarre gjatë demonstratës. Ndërkohë, aeroporti i Brukselit anuloi 430 fluturime të enjten, por autoritetet theksuan se ndikimi në sektorin ajror do të zgjaste vetëm një ditë.
Protestuesit mbanin pankarta me mesazhe si "Ne nuk jemi limona" dhe disa prej tyre kishin parulla në latinisht, si një referencë ndaj kryeministrit të ri Bart De Wever, i njohur për përdorimin e shprehjeve latine në fjalimet e tij.
Greva pritet të ndikojë edhe në transportin publik dhe shërbimet postare, ndërsa protestës iu bashkuan edhe zjarrfikësit dhe ushtarakët. Reforma e pensioneve favorizon ata që punojnë përtej moshës së daljes në pension me 35 vite pune, ndërsa ata që dalin më herët, por pa plotësuar këtë kriter, do të penalizohen.
Ky sistem i ri është më pak i favorshëm për shtresat me të ardhura më të ulëta, krahasuar me skemën e mëparshme që ofronte një shumë fikse bazuar në kohëzgjatjen e karrierës.
Qeveria e re e udhëhequr nga nacionalisti flamand Bart De Wever u betua më 3 shkurt, pas tetë muajsh negociata që çuan në formimin e një koalicioni me pesë parti, duke përfshirë të djathtën, qendrën dhe socialistët e partisë Vooruit. Sindikata socialiste kishte paralajmëruar se do të thërriste grevë nëse Vooruit do të bëhej pjesë e qeverisë kryesisht qendrore të djathtë.
