Kryeqyteti po përballet me një rënie të ndjeshme të konsumit në bare dhe restorante, duke reflektuar mungesën e turistëve dhe dobësimin e fuqisë blerëse të vendasve. Sipas Enri Jahjës, kryetarit të Shoqatës së Bareve dhe Restoranteve, krahasuar me janarin e vitit të kaluar, konsumi ka rënë me 20%, një goditje e rëndë për bizneset e këtij sektori.
Në vitin 2024, Tirana përjetoi një fluks të pazakontë turistësh në muajin janar, por ky trend nuk është përsëritur në 2025. Ekspertët e sektorit fajësojnë mungesën e turistëve të huaj dhe emigrimin masiv të vendasve si faktorët kryesorë për këtë tkurrje ekonomike.
“Turistët e huaj që vitin e kaluar konsumonin në baret dhe restorantet e Tiranës nuk janë më. Po ashtu, edhe vendasit po kufizojnë shpenzimet për shkak të çmimeve të larta dhe emigracionit në rritje,” deklaroi Jahja për mediat.
Situata është aq e rënduar sa në disa qytete bregdetare, si Lezha, Vlora dhe Saranda, bizneset e shërbimit ushqimor kanë vendosur të mbyllen përkohësisht, duke pritur sezonin e verës për t’u rihapur.
Të dhënat zyrtare tregojnë se numri i bareve dhe restoranteve në vend ka pësuar rënie të ndjeshme vitet e fundit. Nga 22 mijë njësi në vitin 2015, sot operojnë vetëm 15,500, ndërsa sektori vazhdon të përballet me mungesë të madhe fuqie punëtore dhe probleme me informalitetin e pagave.
