Gjendja e infrastrukturës në Urgjencën e Spitalit Rajonal të Lezhës lë shumë për të dëshiruar, duke ngritur shqetësime serioze për higjienën dhe sigurinë e pacientëve.
Fotot skandaloze të dërguara nga pacientët në redaksinë e JOQ tregojnë përdorimin e tullave dhe gurëve për të mbështetur një pjesë të shtratit spitalor, ndërsa një kovë e verdhë ndodhet në afërsi të tij, duke ngritur dyshime për rrjedhje apo probleme të tjera strukturore.
Një tjetër detaj shqetësues është prania e leckave të lidhura rreth tubave, një praktikë që jo vetëm është joprofesionale, por edhe e rrezikshme për higjienën, duke krijuar kushte ideale për përhapjen e mikrobeve dhe infeksioneve.
Kjo situatë ka shkaktuar reagime të shumta nga qytetarët, të cilët kërkojnë ndërhyrje të menjëhershme për përmirësimin e kushteve në këtë institucion shëndetësor.
