Endi Bardhi është 12-vjeçarja nga Sukthi që ndërroi jetë ditën e djeshme pas një hemorragjie cerebrale.
Ajo u ndie keq gjatë orës së mësimit dhe u dërgua urgjentisht në Spitalin Rajonal të Durrësit me konvulsione, rreth orës 09:30 të mëngjesit. Mjekët zbuluan se ajo kishte pësuar një hemorragji cerebrale, dhe gjendja e saj u përkeqësua shpejt. Pas ekzaminimit me skaner, u konstatua shkaku i gjendjes së rënduar shëndetësore.
12-vjeçarja ndërroi jetë rreth orës 18:30 të së premtes, ndërkohë që autoritetet kanë nisur hetimet për të sqaruar ngjarjen. Autopsia dhe ekspertiza mjeko-ligjore pritet të japin më shumë informacion mbi shkakun e vdekjes.
Trupi i pajetë i Endi Bardhit do të dërgohet për t'u varrosur në Sukth rreth orës 15:00 të ditës së sotme.
