Presidenti i Kolumbisë, Gustavo Petro, deklaroi gjatë një mbledhjeje qeveritare se kokaina "nuk është më e keqe se uiski" dhe se është e paligjshme vetëm për shkak se prodhohet në Amerikën Latine.
Kolumbia, prodhuesi dhe eksportuesi më i madh i kokainës në botë, ka luftuar për dekada kundër trafikut të drogës. Sipas Petro-s, droga është përdorur si një justifikim nga politikanët amerikanë që kanë luftuar për vite me radhë kundër saj.
“Kokaina është ilegale sepse prodhohet në Amerikën Latine, jo sepse është më e keqe se uiski,” tha Petro gjatë një mbledhjeje qeveritare që zgjati gjashtë orë.
Ai shtoi se “shkencëtarët kanë analizuar këtë çështje: kokaina nuk është më e keqe se uiski,” duke sugjeruar se industria globale e kokainës mund të "shkatërrohet lehtë" nëse droga legalizohet në nivel global.
“Nëse dikush dëshiron paqe, biznesi i trafikut të drogës duhet të shkatërrohet,” theksoi ai. “Mund të shitet si vera nëse legalizohet.”
Petro gjithashtu theksoi se fentanyli, i cili ka kontribuar në krizën e opioideve në SHBA, "po vret amerikanët, por nuk prodhohet në Kolumbi."
“Fentanyli u krijua si ilaç farmaceutik nga multinacionalet veriamerikane,” tha Petro, duke shtuar se përdoruesit e tij janë bërë të varur.
Më tej, ai përmendi përplasjet me administratën e presidentit të ri amerikan Donald Trump, pas ndalimit fillestar të avionëve ushtarakë amerikanë që transportonin migrantë të kthyer në Kolumbi. Për shkak të presionit të mundshëm për tarifa ndëshkuese, Kolumbia ra dakord të pranonte migrantët "pa kufizime ose vonesa."
Sipas Kombeve të Bashkuara, prodhimi i kokainës në Kolumbi arriti një rekord të ri në vitin 2023, duke u rritur me 53% në mbi 2600 ton.
