Kremlini ka konfirmuar sot se zyrtarët rusë kanë pasur kontakte me anëtarët e administratës së Donald Trump, por nuk ka sqaruar nëse këto bisedime janë fokusuar në përfundimin e luftës në Ukrainë.
“Ka pasur kontakte midis agjencive të caktuara dhe ato janë intensifikuar kohët e fundit,” deklaroi zëdhënësi i Kremlinit, Dmitry Peskov, gjatë një konference për shtyp. “Nuk mund të ndaj më shumë detaje,” shtoi ai, sipas raportimeve të The Moscow Times.
Peskov gjithashtu kundërshtoi gatishmërinë e shprehur së fundmi nga presidenti ukrainas, Volodymyr Zelensky, për të negociuar drejtpërdrejt me presidentin rus, Vladimir Putin.
“Gatishmëria duhet të bazohet në diçka konkrete,” tha ai, duke iu referuar vendimit të Zelensky-t në vitin 2022 për të mos zhvilluar negociata paqeje me Moskën për sa kohë që Putin është president i Rusisë. “Për momentin, këto nuk janë gjë tjetër veçse fjalë boshe,” shtoi Peskov.
Ndërkohë, Donald Trump deklaroi të dielën se anëtarët e administratës së tij tashmë po zhvillojnë bisedime me autoritetet ruse për t’i dhënë fund luftës në Ukrainë.
“Ne do të flasim dhe mendoj se mund të bëjmë diçka që do të jetë domethënëse,” u shpreh Trump përpara gazetarëve në Shtëpinë e Bardhë. “Ne duam t’i japim fund asaj lufte.”
Kur u pyet nëse ai kishte zhvilluar një bisedë telefonike me Putinin, Trump refuzoi të jepte një përgjigje të drejtpërdrejtë, duke thënë: “Nuk dua ta them këtë.”
Muajin e kaluar, Putin shprehu gatishmërinë për të takuar Trumpin për të diskutuar mbi luftën në Ukrainë dhe fusha të tjera me interes të ndërsjellë për SHBA-në dhe Rusinë.
Sipas një raportimi të Reuters në fillim të kësaj jave, zyrtarët rusë po shqyrtojnë mundësinë e mbajtjes së bisedimeve midis dy liderëve në Arabinë Saudite ose Emiratet e Bashkuara Arabe.
