Policia e Tiranës ka shoqëruar babain dhe xhaxhanë e një 15-vjeçari, i cili mbeti i plagosur në rrethana misterioze, mbrëmjen e kaluar më 30 janar 2025 në Fushë Mëzez, Kashar.
Hetuesit dyshojnë për një konflikt të mundshëm brenda familjes, që ka çuar në përdorimin e armëve, por deri tani nuk ka një version të qartë të ngjarjes.
Dëshmia e të miturit është e pasigurt dhe kontradiktore në krahasim me gjetjet e grupit hetimor. Ai ka deklaruar se ka pasur të shtëna nga një makinë e zezë, e cila është larguar menjëherë, ndërkohë që hetuesit, pas inspektimit të vendit të ngjarjes, kanë konstatuar 5 vrima plumbash në derën e oborrit, të cilat janë qëlluar nga brenda, duke hedhur poshtë mundësinë e një sulmi nga jashtë.
Një tjetër dëshmi e kontradiktuar ka ardhur nga babai i të plagosurit, i cili ka pohuar se ka dëgjuar të shtëna dhe më pas ka parë djalin e tij të mbërrinte i plagosur. Sipas burimeve të policisë, 15-vjeçari është jashtë rrezikut për jetën, por ka marrë tre plumba, një në shpatullë dhe dy në krah.
Hetimet janë duke vazhduar për të sqaruar plotësisht rrethanat e ngjarjes.
