Një Volkswagen Golf me targë të Hanoverit është lënë e braktisur për më shumë se një vit përpara terminalit të aeroportit Berlin-Brandenburg. Në këtë hapësirë, makinat zakonisht qëndrojnë për ndalesa të shkurtra: 10 minutat e para janë falas, 15 minuta kushtojnë pesë euro, ndërsa një orë plot 23 euro.
Sipas mediave, çmimi për një ditë parkimi shkon deri në 552 euro. Si pasojë, shuma totale e akumuluar për këtë makinë ka arritur mbi 200 mijë euro.
Sidoqoftë, ende nuk është identifikuar pronari i automjetit, dhe nuk është e qartë se kush do të mbajë përgjegjësinë për këtë rast të pazakontë.
Policia ka deklaruar se, pasi makina nuk ndodhet në rrugë publike, përgjegjësia bie mbi aeroportin Berlin-Brandenburg ose mbi kompaninë që menaxhon parkimin. Der Spiegel ka raportuar se makina ende ndodhet në parking, sipas një konfirmimi nga autoritetet e aeroportit.
Dyshohet se automjeti mund të jetë i vjedhur. Gazeta Bild njofton se ekziston një problem juridiksioni mbi këtë rast. Policia e Hanoverit nuk sheh arsye për të ndërhyrë, duke deklaruar se kjo është përgjegjësi e policisë së Berlinit ose e policisë federale.
Ndërkohë, administratori i parkingut ka konfirmuar për Berliner Zeitung se është në dijeni të çështjes dhe është në kontakt me pronarin e parkingut dhe autoritetet përkatëse.
Edhe nëse identifikohet pronari i makinës, kjo nuk do të thotë se ai duhet të paguajë detyrimisht shumën prej 200 mijë eurosh. Sipas kompanisë që menaxhon parkimin, kjo varet nga aftësia e debitorit për të mbuluar shpenzimet financiare.