Jennifer Alcani, 13 vjeçe, ndërroi jetë më 16 janar në spitalin Manzoni të Lecco, pas një aksidenti të rëndë rrugor më 10 janar. Vajza ishte në koma për gjashtë ditë dhe nuk e rifitoi vetëdijen. Aksidenti ndodhi rreth orës 5 të mëngjesit, në hyrje të një tuneli në provinciale 72, afër Abbadia Lariana. Makina, e drejtuar nga një djalë 22-vjeçar që po udhëtonte me shpejtësi mbi 150 kilometra në orë, humbi kontrollin dhe u përplas me një parmak betoni. Jennifer ndodhej në sediljen e pasme dhe kishte vendosur rripin e sigurimit, por pësoi një traumë të rëndë në kokë.
Më herët, ajo kishte dalë fshehurazi nga shtëpia për të kaluar natën me dy miq më të rritur. Para aksidentit, të rinjtë kishin konsumuar alkool dhe në makinë ishin gjetur shishe të tjera. Njëri nga djemtë, 19 vjeç, kishte postuar një video në TikTok duke treguar shpejtësinë e lartë dhe muzikën në maksimum.
Shoferi 22-vjeçar është nën hetim për vrasje nga pakujdesia dhe më parë ishte hetuar për plagosje të rëndë rrugore. Pas aksidentit, ai kishte tentuar të largohej nga spitali për të shmangur testin e alkoolit.
