Një video virale që tregon një krokodil të madh në ujërat e Borneos në Indonezi, ka ngritur pyetje të pazakonta.
Në pamjet e filmuara nga një banor lokal, krokodili shihet me këmbët lart mbi sipërfaqen e ujit, duke i lëvizur në mënyrë të çuditshme. Banorët lokalë besojnë se këto lëvizje imitojnë një njeri që po mbytet, duke ngritur teori se kafshët mund të jenë duke joshur njerëzit për t’i sulmuar.
Megjithatë, ekspertët i kanë hedhur poshtë këto pretendime. Brandon Sideleau, studiues i konflikteve midis njerëzve dhe krokodilëve në Universitetin Charles Darwin, shpjegoi për Yahoo se sjellja nuk është asgjë e re.
“Sjellja ka shumë të ngjarë të lidhet me faktin që krokodili ka ushqim në nofulla dhe po e shijon atë. Kjo është diçka që kemi parë shpesh në lumenjtë ku jetojnë krokodilët e ujërave të kripura,” tha Sideleau. Ai shtoi se është e pamundur që kafsha të mësojë të joshë njerëz në këtë mënyrë.
Gregory Erickson, profesor i shkencave biologjike në Universitetin Shtetëror të Floridës, e mbështeti këtë ide, duke deklaruar për Newsweek: “Kjo sjellje nuk ka të bëjë me joshjen e njerëzve. Krokodilët janë të fshehtë dhe nuk kanë nevojë të përdorin metoda të tilla ekstreme për të kapur prenë.”
Pavarësisht nga këto shpjegime, ekspertët paralajmërojnë se krokodilët e ujërave të kripura janë tepër të rrezikshëm dhe duhen trajtuar me kujdes dhe respekt. Sipas BBC-së, në Indonezi janë raportuar mbi 1000 sulme nga krokodilët gjatë dekadës së fundit, ku të paktën 450 prej tyre kanë qenë fatale.
