Drejtori i ARRSH-së Gentian Gjyli është paraqitur në Prokurorinë e Posaçme (SPAK) mëngjesin e kësaj të marte.
Gjyli, i cili ka qëndruar për më shumë se dy orë në SPAK, është thirrur si person që ka dijeni për hetimet në lidhje me procedurat e ndjekura në tenderët e rrugëve, gjatë periudhës kur ka mbajtur postin e zv/drejtorit të ARRSH-së, kur drejtor i kësaj agjencie ishte Evis Berberi, që aktualisht ndodhet në hetim nga SPAK dhe është në masën e sigurisë "arrest me burg".
Pas daljes nga SPAK, Gjyli nuk ka dhënë asnjë koment për mediat.
Gentian Gjyli ishte emëruar drejtor i ARRSH-së më 28 mars 2024, pas arrestimit të Evis Berberit, ish-drejtorit të ARRSH-së, i cili akuzohet për korrupsion pasiv dhe pastrim parash. Hetimet janë fokusuar në dhënien e tenderëve për kompaninë e ortakut të Berberit, Valter Begaj, dhe dyshimet për fitime të paligjshme që kalonin në kompanitë që ai zotëronte.
