Detaje të reja kanë dalë në dritë lidhur me ngjarjen e ndodhur një ditë më parë në Astir, ku një vajzë njoftoi Policinë se ishte rrëmbyer, duke kërkuar ndërhyrjen e forcave RENEA për ta shpëtuar.
Si rezultat, pesë persona janë shpallur në kërkim, mes tyre edhe i dashuri i 21-vjeçares, Joni Sadikaj. Bëhet e ditur se të kërkuarit janë nga Tirana, Vlora dhe Tepelena.
Joni Sadikaj nuk është i panjohur për autoritetet. Në vitin 2017, ai u arrestua në Kavajë së bashku me katër persona të tjerë, pasi tentuan të transportonin 1.3 tonë kanabis drejt Italisë, një çështje e hetuar nga ish-Prokuroria e Krimeve të Rënda. Ndërkohë, në korrik të vitit 2022, ai u arrestua sërish pasi iu kap një armë pa leje, një krehër dhe municion luftarak.
Njoftimi i policisë:
"Në vijim të informacionit të dhënë ditën e djeshme, për shtetasen S. Q. që kërkoi ndihmën e Policisë, ndërkohë që ndodhej në katin e tetë të një pallati në Astir, bëjmë me dije se: Si rezultat i veprimeve hetimore të kryera nga Sektori për Hetimin e Krimeve kundër Jetës dhe Pronës, në drejtimin e Prokurorisë së Tiranës, janë identifikuar dhe shpallur në kërkim shtetasit:
S. S., 29 vjeç, A. A., 36 vjeç dhe O. A., 31 vjeç, të tre banues në Tiranë; J. S., 26 vjeç, banues në Tepelenë; dhe A. J., 40 vjeç, banues në Vlorë.
Nga veprimet e para hetimore të kryera për këtë rast dyshohet se këta shtetas, në bashkëpunim me njëri-tjetrin, kanë mbajtur të mbyllur shtetasen S. Q., në apartamentin ku ndodhej, i marrë me qira ditore.
Gjithashtu, ishte marrë me qira ditore apartamenti përballë në të cilin shërbimet e Policisë, ditën e djeshme, gjetën gjatë kontrollit, 2 armë zjarri, municion luftarak dhe sende të tjera personale që do t’i shërbejnë hetimit. Vijon puna për kapjen e 5 shtetasve të shpallur në kërkim. Gjithashtu, vijojnë hetimet në bashkëpunim me Prokurorinë, për dokumentimin e plotë të ngjarjes dhe identifikimin e shtetasve të tjerë që mund të jenë përfshirë.
Materialet proceduriale i kaluan Prokurorisë, për veprat penale “Heqja e paligjshme e lirisë”, kryer në bashkëpunim, “Mbajtja pa leje dhe prodhimi i armëve, armëve shpërthyese dhe e municionit” dhe “Falsifikimi i dokumenteve”."
