Një kabinë elektrike në katin e parë të një pallati 6-katësh në bllokun e banimit pranë lumit Drin në Lezhë është përfshirë nga flakët mbrëmjen e të mërkurës. Si pasojë, kabina është shkrumbuar plotësisht, duke shkaktuar panik te banorët.
Zjarri ka lënë pa energji elektrike 22 abonentët e këtij pallati, ndërsa banorët janë detyruar të largohen për shkak të erës së rëndë të shkaktuar nga tymi. Aktualisht, pallati vijon të jetë i boshatisur.
Sipas të dhënave paraprake, mendohet se zjarri është shkaktuar nga mbingarkesa në rrjetin elektrik, megjithatë, hetimet për të përcaktuar shkakun e saktë janë ende në vijim.
