Qendra Spitalore Universitare “Nënë Tereza” ka reaguar sot (8 janar) lidhur me vdekjen tragjike të një 12-vjeçari nga Maliqi, i cili ndërroi jetë në Spitalin Pediatrik. Ndërkohë, familjarët kanë ngritur akuza ndaj mjekëve, duke pretenduar se i mituri nuk mori trajtimin e duhur për gjendjen e tij shëndetësore.
Sipas QSUT, pacienti u shtrua më 7 janar dhe ndërroi jetë mëngjesin e 8 janarit në Shërbimin e Terapisë Intensive Pediatrike.
Në deklaratën e saj, QSUT bëri të ditur se i mituri u diagnostikua me miokardit akut, një sëmundje e rrallë dhe shumë e rrezikshme, e cila shoqërohet me shkallë të lartë vdekshmërie.
Megjithëse spitali pretendon se ka ndjekur të gjitha protokollet mjekësore dhe ka ofruar kujdes maksimal, familjarët e viktimës kanë shprehur pakënaqësitë e tyre, duke akuzuar stafin për mungesë profesionalizmi dhe trajtim të papërshtatshëm.
