Ann Altman, motra e shefit ekzekutiv të OpenAI, Sam Altman, ka ngritur një padi në një gjykatë në Distriktin Lindor të Misurit, duke pretenduar se ai ka abuzuar seksualisht me të. Sipas padisë, e cila u dorëzua më 6 janar, abuzimi filloi kur Ann ishte vetëm tre vjeç dhe Sam 12 vjeç.
Në një deklaratë të përbashkët në platformën X, Sam Altman, së bashku me nënën dhe dy vëllezërit e tij, hodhën poshtë akuzat, duke i quajtur ato tërësisht të pavërteta. Deklarata shton se përkujdesja për një anëtar të familjes me probleme të shëndetit mendor është tepër e vështirë dhe se situata ka shkaktuar dhimbje të madhe për familjen.
Padia, e cila është parë nga BBC, përfshin pretendime për përdhunim dhe pohon se abuzimi vazhdoi për vite me radhë, përfshirë raste kur Ann ishte ende e mitur dhe Sam tashmë i rritur. Ajo kërkon një gjykim me jurinë dhe dëmshpërblim prej mbi 75,000 dollarë.
Ann Altman ka bërë më parë akuza të ngjashme kundër vëllait të saj në rrjetet sociale. Sam Altman, një nga figurat më të njohura në botën e teknologjisë, është i njohur për zhvillimin e chatbot-it të inteligjencës artificiale ChatGPT, të lançuar nga OpenAI në fund të vitit 2022.
