Një qytetare i është drejtuar redaksisë së JOQ Albania për të bërë një apel të veçantë dhe emocionues.
Ajo dëshiron të gjejë vajzën që i shpëtoi jetën pas një aksidenti të rëndë që ndodhi mbrëmjen e djeshme në autostradën Tiranë-Elbasan, pranë Kopshtit Botanik, në drejtim të TEG.
Më poshtë është apeli i saj i plotë:
“Përshëndetje JOQ! Mbrëmë kam pasur një aksident shumë të rëndë me 3 makina rreth orës 22:45 në autostradën Tiranë-Elbasan, poshtë Kopshtit Botanik në drejtim të TEG. Shyqyr prej Zotit tani jam më mirë, edhe pse pritej më e keqja.
Kërkoj të më ndihmoni të gjej vajzën që më ka ndihmuar! 5-6 veta që kanë qenë aty nuk kanë mundur të hapnin dot derën dhe të më nxirrnin jashtë. Një vajzë kalimtare ka mundur të më nxjerrë nga makina dhe më ka mbajtur të vetëdijshme deri sa ka ardhur ambulanca.
Patrulla e policisë që erdhi në vend, pasi po ju thoja që po humbas vetëdijen dhe nuk mbaj dot ekuilibrin dhe se kisha nevojë për ndihmë, më drejtuan të ulesha në tokë, në autostradë, në shi. Vajza prej aty mori kontrollin e situatës dhe nuk lejoi njeri të më afrohej deri sa erdhi vëllai im dhe ambulanca.
Më tha se ishte infermiere, se kishte një vajzë në shtëpi që po e priste, se kishte lënë Gjermaninë për t’u kthyer në Shqipëri, pasi mësoi që jetoj aty.
Ju lutem ta gjejmë bashkërisht. Dua ta falënderoj dhe ta shpërblej për njerëzillëkun, ndihmën, guximin, për faktin që ka ndaluar në vendngjarje.
Ju falënderoj paraprakisht!”
Përmes këtij apeli të sinqertë, ajo kërkon ndihmën e të gjithë qytetarëve për të identifikuar infermieren e panjohur që tregoi kurajo, humanizëm dhe profesionalizëm të jashtëzakonshëm teksa u gjend rastësisht përballë kësaj situate kritike.
Ky gjest human tregon se mirësia dhe solidariteti ende ekzistojnë në shoqërinë tonë!
