Dy fëmijë janë në mesin e 12 personave të vrarë pasi një person i armatosur hapi zjarr pas një zënke në një lokal në Malin e Zi.
Ministri i Brendshëm i Malit të Zi, Danilo Saranoviç tha se të paktën katër persona u plagosën në sulmin në qytetin e Cetinjes. I dyshuari u identifikua si 45-vjeçari Aleksandar Martinovic.
Ministri tha se Martinovic vrau pronarin e lokalit, fëmijët e pronarit të lokalit dhe anëtarët e familjes së tij, përpara se të largohej dhe arratisej.
Policia dërgoi një njësi speciale për të kërkuar sulmuesin në qytet. Të gjitha rrugët brenda dhe jashtë qytetit u bllokuan ndërsa oficerët u mblodhën nëpër rrugë.
Ministri i Brendshëm tha më vonë se personi i armatosur kishte vdekur pasi kishte vrarë veten pranë shtëpisë së tij në Cetinje, e cila është rreth 18 milje në veriperëndim të kryeqytetit Podgoricë.
Saranoviç tha se Martinovic vdiq ndërsa po transportohej në spital.
Vanja Popoviç, kushërira e njërit prej atyre që vdiqën dhe e një personi tjetër të plagosur tha:
"Djali i tezes sime është në mesin e të vdekurve... jemi të gjithë të tronditur."
Komisioneri i policisë Lazar Scepanoviç tha se Martinovic ishte në bar gjatë gjithë ditës me të ftuar të tjerë kur ndodhi sherri Ai tha se i dyshuari më pas shkoi në shtëpi, mori një armë dhe hapi zjarr rreth orës 17:30. Shefi i policisë tha se ai vrau katër persona në lokal dhe më pas vazhdoi të qëllonte në tre vende të tjera.
I dyshuari besohet se është dënuar me kusht në vitin 2005 për sjellje të dhunshme dhe kishte apeluar dënimin e tij të fundit për armëmbajtje pa leje.
Mali i Zi, i cili ka një popullsi prej 620,000 banorësh, është i njohur për kulturën e armëve dhe shumë njerëz kanë armë.
Sulmi me armë të së mërkurës është sulmi i dytë masiv gjatë tre viteve të fundit në Cetinje, ish-kryeqyteti mbretëror i Malit të Zi.
Në gusht 2022, një person vrau gjithashtu 10 persona, duke përfshirë dy fëmijë para se të qëllohej dhe vritej nga një kalimtar.
Qeveria e Malit të Zi ka shpallur tri ditë zie kombëtare, më 2,3 dhe 4 janar. Koncertet e organizuara me rastin e Vitit të ri në Podgoricë, Budva dhe Kotor u anuluan.
