Popullsia e Gazës ka rënë me 6% që nga fillimi i ofensivës shkatërruese të Izraelit ndaj territorit të rrethuar palestinez, sipas Zyrës Qendrore të Statistikave Palestinez (PCBS). Sipas të dhënave zyrtare, mbi 100,000 palestinezë janë larguar nga Gaza, ndërsa më shumë se 55,000 persona mendohet të kenë humbur jetën.
Raportimet tregojnë se mbi 45,500 palestinezë, më shumë se gjysma gra dhe fëmijë, kanë humbur jetën gjatë luftës, dhe 11,000 të tjerë rezultojnë ende të zhdukur. Për pasojë, popullsia e Gazës ka rënë me rreth 160,000 banorë, duke mbetur në 2.1 milionë, prej të cilëve mbi një milion janë fëmijë nën moshën 18 vjeç.
PCBS thekson se “Izraeli ka nisur një agresion brutal kundër Gazës, duke shënjestruar çdo aspekt të jetës: njerëzit, ndërtesat dhe infrastrukturën jetike. Familje të tëra janë fshirë nga regjistri civil, duke sjellë humbje katastrofike njerëzore dhe materiale.”
Ndërkohë, organizata kryesore të të drejtave të njeriut kanë akuzuar Izraelin për akte gjenocidi ndaj popullit palestinez, duke përmendur shkallën e madhe të vdekjeve, shkatërrimit dhe bllokimin e ndihmave humanitare thelbësore.
Gjykata Ndërkombëtare e Drejtësisë (ICJ) ka kërkuar që Izraeli të parandalojë aktet e gjenocidit kundër palestinezëve, ndërsa Papa Françesku ka sugjeruar që komuniteti ndërkombëtar të studiojë nëse veprimet në Gaza përbëjnë gjenocid.
Bllokimi i vazhdueshëm i kufijve nga Izraeli ka ndaluar hyrjen e ndihmave të domosdoshme, përfshirë ushqimin dhe ilaçet. Në veri të Gazës, ku është vendosur një rrethim edhe më i ashpër, banorët përballen me uri dhe bombardime të pamëshirshme, ndërsa qendrat mjekësore kryesore janë plaçkitur dhe shkatërruar.
Rreth 3,500 fëmijë rrezikojnë të humbin jetën nga kequshqyerja dhe mungesa e ushqimit. Gjithashtu, 60,000 gra shtatzëna janë në rrezik të madh për shkak të shërbimeve shëndetësore të shkatërruara dhe mungesës së aksesit në kujdesin mjekësor.
Fëmijët e sapolindur janë veçanërisht të rrezikuar, duke humbur jetën për shkak të kushteve të ashpra të jetesës dhe temperaturave të ulëta, sipas zyrës së mediave qeveritare palestineze në Gaza.
