Deputeti i Partisë Socialiste, Blendi Klosi, ka propozuar një masë që ka shkaktuar reagime të ashpra dhe indinjatë të madhe në mesin e qytetarëve dhe sipërmarrësve të vegjël. Klosi sugjeron që hotelet dhe rezortet luksoze me katër dhe pesë yje, të njohura ndërkombëtarisht me marka të mirënjohura, të përjashtohen nga tatimi mbi të ardhurat korporative për një periudhë dhjetëvjeçare, për ato struktura që marrin statusin special deri në dhjetor 2026.
Kjo lëvizje është interpretuar si një tjetër favor i hapur për oligarkët, të cilët kanë monopolin mbi sektorin e turizmit luksoz. Ndërkohë që qeveria përqafon interesat e miliarderëve dhe u siguron atyre lehtësi fiskale kolosale, bizneset e vogla, të cilat janë shtylla e ekonomisë shqiptare, vazhdojnë të përballen me barrë të rëndë tatimore dhe asnjë mbështetje nga shteti.
Dyqanet e vogla, restorantet familjare dhe shërbimet lokale që mbajnë mbi shpinë barrën e taksave, ankohen për mungesë të investimeve nga shteti. Këto biznese, të cilat krijojnë vende pune dhe mbështesin ekonominë lokale, nuk kanë përfituar asnjë ulje taksash apo subvencion të mirëfilltë, ndërkohë që hotelet e luksit marrin "status special" dhe përjashtime fiskale.
Kjo nuk është hera e parë që qeveria e Edi Ramës akuzohet për lidhje të ngushta me oligarkët. Nga kontratat e mëdha për ndërtimin e rrugëve te koncesionet e dyshimta në shëndetësi, gjithmonë duket se janë të njëjtët emra që përfitojnë. Propozimi i Klosit për të lehtësuar taksat për hotelet e luksit është një tjetër shembull i politikave që injorojnë nevojat e shumicës dhe mbrojnë interesat e një pakice të pasur.
Bizneset e vogla, të cilat janë burimi kryesor i punësimit në vend, nuk marrin asnjë mbështetje konkrete nga shteti. Në vend të kësaj, ato përballen me inspektime të rrepta, gjoba të shumta dhe një sistem të ndërlikuar fiskal që vetëm sa i rëndon edhe më shumë. Kjo bën që shumë prej tyre të falimentojnë ose të punojnë në informalitet për të mbijetuar. Restorantet e vogla në plazhe dhe hotelet modeste, të cilat shpesh janë familjare, nuk marrin asnjë ndihmë fiskale, ndërsa oligarkët që kontrollojnë zinxhirët e mëdhenj të hoteleve luksoze përfitojnë dhurata bujare nga buxheti i shtetit.
Kjo pabarazi e thellë midis të pasurve dhe të varfërve është një tregues i dështimit të politikave ekonomike të qeverisë. Shqiptarët po e kuptojnë gjithnjë e më shumë se përfitimet e turizmit dhe zhvillimit ekonomik përfundojnë në duart e një grupi të vogël njerëzish, ndërsa pjesa tjetër e vendit mbetet e braktisur dhe e zhytur në borxhe.
