Edi Rama vazhdon të mburret me shifrat e turizmit, duke pretenduar se Shqipëria ka pritur mbi 10 milionë turistë në vitin 2023. Kjo shifër, sipas tij, është një sukses historik, por realiteti në terren tregon një histori krejt tjetër. Ndërsa propaganda qeveritare lavdëron këtë "arritje", shqiptarët përballen me bllokimin e plotë të rrugëve gjatë festave të fundvitit, një pasqyrë e qartë e dështimit të plotë të infrastrukturës në vend.
Rrugët kryesore të vendit janë kthyer në pika të nxehta trafiku. Shqiptarët që tentojnë të shkojnë tek familjet për festat e fundvitit kanë kaluar orë të tëra të bllokuar në radhë kilometrike automjetesh. Aksi Tiranë-Elbasan dhe hyrja e Durrësit drejt Tiranës janë shembujt më të prekshëm të një infrastrukture të mjerueshme, që nuk është në gjendje të përballojë as lëvizjet bazike të qytetarëve, e jo më një fluks turistësh ndërkombëtarë.
Pavarësisht premtimeve për investime të mëdha në rrugë dhe modernizimin e infrastrukturës, qytetarët përballen çdo ditë me vonesa të pafundme dhe kushte të turpshme në transportin rrugor. Ironia e gjithë kësaj qëndron tek fakti që, ndërsa qeveria lavdëron shifrat rekord të turistëve, qytetarët shqiptarë, taksapaguesit që mbajnë në këmbë këtë sistem, mbeten të bllokuar në rrugët e vendit të tyre.
Një tjetër aspekt që nuk përmendet nga Rama është mungesa e përgatitjes për të menaxhuar flukset. Nuk ka asnjë strategji serioze për trafikun, asnjë përmirësim në rrugët dytësore që mund të lehtësonin lëvizjen, dhe asnjë përkushtim për të përmirësuar realisht jetën e përditshme të qytetarëve. Çdo vit përmend shifra pompoze, por a mund të përballojë Shqipëria 10 milionë turistë kur as vetë shqiptarët nuk mund të udhëtojnë pa u përballur me kaos total?
Ky është një dështim spektakolar, që tregon më qartë se çdo fjalim i bukur se si propaganda qeveritare është e shkëputur nga realiteti i qytetarëve. Në vend që të mburret me arritje imagjinare, Rama duhet të japë llogari përse shqiptarët po vuajnë në bllokime trafiku dhe një infrastrukturë që mezi funksionon. Rrugët e Shqipërisë janë prova e gjallë e një dështimi kombëtar për të siguruar standardet më minimale për qytetarët dhe vizitorët.
Shqipëria nuk ka nevojë për mburrje, por për veprime konkrete. Çdo fjalë boshe rreth turizmit dhe zhvillimit është një fyerje për ata që çdo ditë përballen me këtë realitet të mjerueshëm.
