E gjithë zona e Ishull Lezhës është vendosur në karantinë për një periudhë 21-ditore, pas konfirmimit të përhapjes së murtajës afrikane të derrave.
Rasti u identifikua në një fermë të zonës, ku ndodheshin rreth 130 krerë derra. Autoritetet veterinare kanë nisur procesin e asgjësimit të derrave të ngordhur dhe po përgatiten për groposjen e tyre, e cila pritet të kryhet gjatë pasdites.
Përfaqësuesit e shërbimit veterinar kanë bërë thirrje që qytetarët të tregohen të kujdesshëm dhe të shmangin blerjen e mishit të derrit nga tezgat pa certifikatë veterinare.
Gjithashtu, autoritetet kanë ngritur shqetësime për tregun e gjësë së gjallë në Milot, duke kërkuar ndërhyrje të menjëhershme nga pushteti lokal për marrjen e masave të nevojshme, pasi ky treg konsiderohet një vatër potencialisht e rrezikshme për përhapjen e sëmundjes.
