Një sulm ajror i kryer nga avionë ushtarakë pakistanezë në provincën lindore Paktika të Afganistanit shkaktoi të paktën 46 viktima, shumica prej të cilëve ishin gra dhe fëmijë, raportoi qeveria e Talibanëve afganë.
Sulmi ka shkaktuar edhe gjashtë të plagosur, sipas zëvendës zëdhënësit Hamdullah Fitrat. Talibanët paralajmëruan se do të hakmerren për këtë akt.
Qeveria dhe ushtria pakistaneze nuk kanë dhënë ende asnjë koment lidhur me incidentin. Ndërkohë, Ministria e Punëve të Jashtme të Afganistanit ka thirrur në një takim urgjent kreun e misionit pakistanez në Kabul, duke i dorëzuar një notë proteste dhe paralajmëruar për pasojat e këtij akti.
"Afganistani e konsideron këtë veprim brutal si një shkelje të hapur të të gjitha parimeve ndërkombëtare dhe një akt të qartë agresioni," deklaroi Enayatullah Khowrazmi, zëdhënës i Ministrisë së Mbrojtjes Kombëtare. "Emirati Islamik nuk do ta lërë këtë akt të ulët pa përgjigje."
Një zyrtar pakistanez, i cili kërkoi të mbetej anonim, tha për Reuters se Pakistan kishte ndërmarrë sulme ajrore ndaj një kampi të grupit militant TTP (Talibanët Pakistanezë). Ky grup, ndonëse betohet për besnikëri ndaj Talibanëve afganë, nuk është pjesë direkte e qeverisë së tyre dhe synon vendosjen e ligjit islamik në Pakistan.
Një sulm i madh i TTP në zonën e Waziristanit Jugor, që kufizohet me vendndodhjen e kampit të pretenduar në Afganistan, vrau 16 forca të sigurisë pakistaneze të shtunën. Ministria e Mbrojtjes së Afganistanit raportoi se viktimat e bombardimit ishin kryesisht "refugjatë Waziristani," duke treguar se ata ishin nga territori i Waziristanit në Pakistan.
Marrëdhëniet mes dy fqinjëve kanë qenë të tensionuara, me Pakistanin që akuzon Afganistanin për strehimin e militantëve të TTP që kryejnë sulme brenda territorit të tij, një akuzë që Talibanët afganë e mohojnë.
Këto marrëdhënie u komplikuan më tej në mars, kur Talibanët akuzuan Pakistanin për dy sulme ajrore që vranë pesë gra dhe fëmijë në territorin afgan. Në atë kohë, Pakistani deklaroi se kishte kryer "operacione anti-terroriste të bazuara në inteligjencë," por nuk specifikoi natyrën e tyre.
