Një taksist 26-vjeçar është arrestuar nga policia e Tiranës, pasi akuzohet se ka grabitur një klient gjatë një udhëtimi. Sipas burimeve zyrtare, ngjarja ka ndodhur në orët e para të mëngjesit, kur i dyshuari ka marrë në taksinë e tij një 20-vjeçar dhe gjatë rrugës ka ndaluar mjetin në një zonë të pabanuar pranë lagjes së Çollakëve. Në këtë moment, i dyshuari ka ushtruar dhunë ndaj klientit, duke i marrë një shumë parash dhe dy aparate celularë. Pas kësaj, ai e ka zbritur klientin nga taksia dhe është larguar nga vendi i ngjarjes.
Policia u vu në lëvizje menjëherë pas kallëzimit të bërë nga viktima, i cili raportoi ngjarjen në Komisariatin Nr. 1. Pas veprimeve të shpejta hetimore, uniformat blu arritën të identifikojnë dhe ndalojnë autorin e dyshuar, shtetasin A.P., 26 vjeç.
I dyshuari akuzohet për veprën penale "Vjedhje me dhunë" dhe materialet për këtë rast i janë referuar Prokurorisë për veprime të mëtejshme procedurale. Hetimet për rastin vijojnë për të zbardhur rrethanat e plota të ngjarjes.
