Brikena drejt shërimit, kryen me sukses operacionet në Turqi falë solidaritetit të shqiptarëve

Një lajm i mrekullueshëm vjen për rastin e Brikena Dervishit, 13-vjeçarja nga fshati Therepel i Skraparit, e cila ndodhej në një gjendje të rëndë shëndetësore për shkak të mëlçisë së zmadhuar dhe hipertensionit portal. Pas dy operacioneve të suksesshme në Turqi, Brikena është drejt rikuperimit dhe shumë shpejt pritet të lërë spitalin.

Ka qenë kushëriri i Brikenës, Donaldi, i cili ndau lajmin e mirë përmes një postimi në Facebook, ku shprehet se ajo ndodhet në gjendje të mirë shëndetësore dhe çdo gjë po shkon sipas pritshmërive të mjekëve.

Postimi i plotë i Donaldit:

Të dashur miq! Me shumë gëzim ju njoftojmë se Brikena shumë shpejt pritet të dalë nga spitali! Doktori ka konfirmuar që nga e hëna mund të hiqen të gjitha aparaturat, dhe së shpejti do të jetë pranë nesh. Faleminderit të gjithëve për mbështetjen dhe lutjet tuaja gjatë kësaj kohe. Ajo është në gjendje të mirë shëndetësore dhe çdo gjë po ecën sipas pritshmërive të mjekut. Jemi shumë të lumtur për progresin e saj dhe falënderues për kujdesin e jashtëzakonshëm që ka marrë. Faleminderit nga zemra të gjithë miqve tanë që na mbështetën dhe vazhdojnë të jenë pranë nesh gjatë kësaj periudhe. Mirënjohja jonë për ju është e pakufijshme! Ju përshëndes me mirënjohje dhe respekt, Donaldi"

Brikena, e diagnostikuar që në moshën 6-vjeçare, kishte nevojë urgjente për dy ndërhyrje të specializuara: një kirurgji Shunt Portokaval dhe një Devaskularizimi Ezofagogastrik, të cilat u realizuan me sukses në Spitalin Intercontinental Hisar në Stamboll.

Kjo arritje nuk do të ishte e mundur pa mbështetjen e jashtëzakonshme të shqiptarëve, të cilët u bashkuan për të mbledhur shumën e nevojshme prej 100 mijë eurosh për kurimin e saj. Kjo histori është dëshmi e forcës së solidaritetit dhe zemërgjerësisë që bashkon popullin tonë në momente të vështira.