Dy vjet më parë, qeveria premtoi të rriste pagat mesatare të administratës publike në rreth 900 euro, me qëllim uljen e diferencave me vendet e rajonit. Pas dy vitesh, paga mesatare mujore bruto për administratën publike është rritur me 15% gjatë tremujorit të tretë të vitit 2024, duke arritur në 96,800 lekë, që me kursin aktual llogaritet rreth 987 euro.
Megjithatë, rajoni ka vijuar të përparojë. Në vende si Serbia, Mali i Zi, Bosnjë-Hercegovina dhe Maqedonia e Veriut, pagat mesatare publike janë aktualisht rreth 20% më të larta, duke arritur deri në 1,400 euro në muaj.
Ndërkohë, sektori privat në Shqipëri ka hasur vështirësi në ndjekjen e këtij ritmi, sipas Monitor. Diferenca mes pagave në sektorin publik dhe atë privat ka arritur në 40%, nga 22% dy vite më parë. Pagat më të larta në sektorin privat janë vërejtur kryesisht në fusha me aftësi bazike, si pastrimi, ndërtimi dhe turizmi, të ndikuara nga mungesa e fuqisë punëtore për shkak të emigracionit. Megjithatë, këto rritje nuk janë shoqëruar me rritje të produktivitetit, duke nxitur informalitet dhe kontrolle nga administrata tatimore.
Për sa i përket fuqisë blerëse, qytetarët përballen me vështirësi për shkak të rritjes së çmimeve dhe shtrenjtimit të kostos së jetesës gjatë dy viteve të fundit. Paga mesatare publike, kur llogaritet me kursin e këmbimit të dy viteve më parë (115 lekë për euro), do të ishte rreth 840 euro, 30% më pak se mesatarja rajonale.
Në këtë kontekst, qeveria po përballet me presionin për të përmirësuar mjedisin e biznesit dhe për të ulur barrën fiskale për bizneset dhe individët, si një mënyrë për të rritur qëndrueshmërinë ekonomike dhe fuqinë blerëse. Ekspertët paralajmërojnë se masat e rritjes së pagave nëpërmjet presionit mund të kenë efekte të padëshiruara në afat të gjatë, përfshirë falimentime të bizneseve dhe rënie të mëtejshme të fuqisë blerëse.
