Policia shqiptare ka zbuluar dy grupe kriminale që trafikonin lëndë narkotike cannabis sativa nga Amerika dhe Tajlanda përmes Postës Shqiptare. Lënda narkotike ishte dërguar nga Amerika me një pako që ishte paraqitur si fara për bar për fusha futbolli dhe kishte mbërritur në Tiranë.
Ndërkohë, nga Tajlanda, lënda narkotike ishte transportuar në pesë paketa të kamufluara si noodle (makarona aziatike), të cilat ishin paketuar me kujdes për t'u fshehur.
Në kuadër të operacioneve "Destinacioni 1" dhe "Destinacioni 2", policia ka arrestuar tre persona dhe ka shpallur në kërkim tre të tjerë. Gjatë aksionit, janë sekuestruar 4 kilogramë cannabis sativa me përqindje të lartë THC, të cilat dyshohet se do të shiteshin në Tiranë dhe Elbasan, si dhe një sasi kokaine e gjetur në banesën e një prej të arrestuarve. Lënda narkotike THC ka cilësi shumë të lartë dhe shitet me çmime të ngjashme me ato të kokainës, ku 3 gramë THC kapin një vlerë prej rreth 100 euro.
