Një 45-vjeçare është arrestuar në Berat lidhur me ngjarjen tragjike ku një punonjës humbi jetën pasi u godit nga një masiv guri në zonën e kalasë. Shtetasja e arrestuar është investitorja e subjektit ku po punohej. Ngjarja ndodhi ditën e djeshme gjatë punimeve për rikonstruksionin e një objekti.
Autoritetet kanë shpallur në kërkim dy persona të tjerë, administratorin dhe drejtuesen teknike të firmës së ndërtimit, të moshës 53 dhe 41 vjeç.
Sipas hetimeve paraprake, punonjësi i ndjerë punonte i paregjistruar dhe ngjarja ka ardhur si pasojë e shkeljes së rregullave të sigurisë në punë.
Hetimet po vijojnë për të zbardhur rrethanat e plota dhe për kapjen e personave të shpallur në kërkim.
