Në prill të këtij viti, Rakip Suli, kryetari i Bashkisë Kamëz shpalli tenderin për prishjen e stadiumit të qytetit me sipërfaqe 13.000 m2 dhe ndërtimin e godinës së re të bashkisë.
Asokohe, Bashkia e Kamzës njoftoi Agjencinë e Prokurimeve Publike për tenderin "për hartimin e projektit për ndërtimin e një godine 3 katëshe dhe me 1 kat parkim nën tokë". Për prishjen e stadiumit, Rakip Suli u arsyetua me kushtet e papërshtatshme për zhvillimin e aktiviteteve sportive, ndërsa për godinën e re, ai tha se ajo do plotësojë kapacitetet dhe nevojat e bashkisë dhe vizitorëve të saj.
"Për të plotësuar nevojat e bashkisë por edhe të vizitorëve të bashkisë propozohet parkim nëntokësor me sipërfaqe 3.000 m2. Godina e propozuar bashkiake ka një sipërfaqe prej 1.664 m2 të ndarë në tre kate, edhe 318 m2 bodrum".
Vlera e tenderit me objekt “ndërtim i parkimit me 1 kat nëntokë, objekti 3 kat i bashkisë dhe rehabilitimi i sheshit” ishte 82 milionë lekë. Por pak ditë më vonë Agjencia e Prokurorimit Publik la gjithë planin e Sulit në letër duke anuluar tenderin "për shkak se dokumentet përmbanin gabime ose mangësi të rëndësishme”.
Anulimi për këto arsye nuk ia kanë zbehur aspak 'vullnetin' Rakip Sulit i cili nga prilli e deri më tani ka "punuar fort" dhe i është rikthyer sërish idesë për prishjen e stadiumit të Kamzës dhe ndërtimit të re të godinës së bashkisë për të.
Pak ditë më parë, ai ka dorëzuar në Agjencinë e Prokurimeve Publike tenderin e ri për "për ndërtimin e parkimit me 1 kat nëntokë objekti 3 kate të bashkisë Kamëz dhe rehabilitimi i sheshit". Për këtë tender Bashkia Kamëz ka parashikuar të shpenzojë sërish 82 milione lekë të vjetra.
Por nëse plani i Rakip Sulit duket normal dhe i nevojshëm për bashkinë dhe kamzalinjtë, e vërteta duket se është ndryshe. Burime pranë Këshillit Bashkiak të Kamzës kanë treguar për JOQ ALBANIA se synimi i vërtetë i planit është pasurimi i oligarkëve me ndërtimin e pallateve të reja në sipërfaqen ku ndodhet aktualisht godina e Bashkisë Kamëz.
Me një zinxhir veprimesh, Rakip Suli ka vendosur prishjen e stadiumit të Kamzës dhe ndërtimin e stadiumit të ri në Valias me vlerë 2.5 milionë euro. Pas kësaj, godina e Bashkisë Kamëz do prishet dhe do ndërtohet në sipërfaqen aktuale të stadiumit, ndërsa vetë territori aktual i bashkisë do shfrytëzohet nga oligarkët e ndërtimit pasi vlera është e lartë duke qenë se është në rrugën kryesore të qytetit.
Ende nuk dihet se kujt ia ka premtuar Suli këtë "nder", por ajo që mund të themi është se interesat e nevojat e kamzalinjëve janë lënë në harresë.
