Kryetari i BDI-së, Ali Ahmeti, ka reaguar pas përfshirjes së Artan Grubit, zyrtar i lartë i kësaj partie, në listën e zezë të SHBA-së. Ai theksoi se ‘‘Grubi është i përgjegjshëm dhe i ndërgjegjshëm’’ dhe shtoi se ‘‘sigurisht që ai do të tërhiqet vetë nga të gjitha funksionet e partisë’’.
Ahmeti gjithashtu theksoi se as ai dhe as partia që ai drejton nuk i kontestojnë vendimet e Departamentit të Shtetit të SHBA-së.
‘‘Unë mendoj se z. Grubi është i përgjegjshëm dhe i ndërgjegjshëm. Nuk ka nevojë ta largojë partia; ai vetë do të tërhiqet nga të gjitha funksionet e partisë. Nuk i kontestojmë vendimet e Departamentit të Shtetit. Z. Grubi ka të drejtën të apelojë dhe të zhvillojë një proces në përputhje me faktet, pasi kjo e drejtë i njihet atij në vendimin e Departamentit të Shtetit. Z. Grubi nuk ka as qëllim të dëmtojë subjektin e tij, familjen e tij, apo BDI-në, deri në përfundimin e këtij procesi,” deklaroi Ahmeti.
