Një situatë prekëse është raportuar nga spitali i Shkodrës, ku një grua e moshuar, rreth 85 vjeç, ka mbetur e vetme pa asnjë përkujdesje familjare që nga e hëna. Një qytetare, e shtruar në të njëjtin pavijon, ka ndarë këtë histori në redaksinë e JOQ Albania, duke treguar se kujdesi dhe ngrohtësia ndaj të moshuarës po ofrohen vetëm nga stafi i kardiologjisë dhe pacientët e dhomës.
“Nga e hëna e deri sot nuk është paraqitur asnjë familjar për t'u kujdesur për të. Përkujdesja dhe ngrohtësia i janë ofruar vetëm nga stafi i kardiologjisë dhe pacientët e dhomës,” – shkruan qytetarja.
Apeli i saj bën thirrje për ndërgjegjësimin e qytetarëve dhe institucioneve për të ndihmuar këtë nënë të moshuar, që duket të jetë lënë në harresë nga familja.
Kjo histori rikthen në vëmendje rëndësinë e mbështetjes për të moshuarit dhe përkujdesjes ndaj tyre, sidomos në momente të vështira siç janë ato të shtrimit në spital. Ndihma dhe solidariteti i komunitetit mund të bëjnë një ndryshim të madh për këta persona që kanë dhënë kaq shumë gjatë jetës së tyre.
