Një magazinë e prodhimit të këpucëve në fshatin Shullaz të Kurbinit është shkrumbuar nga flakët mbrëmjen e së premtes, duke vazhduar deri në orët e para të mëngjesit të së shtunës. Ngjarja nuk ka shkaktuar dëme në njerëz, pasi punonjësit ishin larguar nga fabrika, ndërsa dëmet materiale janë të konsiderueshme.
Zjarri, i cili zgjati për rreth katër orë, u shua falë ndërhyrjes së ekipeve zjarrfikëse nga Tirana, Kamza, Mirdita, Lezha dhe Kurbini. Në magazinë ndodheshin materiale si lëkura dhe vajra, të cilat ndihmuan përhapjen e flakëve.
Shkaqet e zjarrit mbeten ende të paqarta, ndërsa grupi hetimor po punon për zbardhjen e plotë të ngjarjes. Për arsye sigurie, policia bllokoi qarkullimin e automjeteve në aksin e vjetër Milot-Laç, ku ndodhej fabrika.
