Një shpërthim në një fabrikë fishekzjarresh në Itali më 18 nëntor ka shkaktuar humbjen e jetës së tre të rinjve, përfshirë 18-vjeçarin shqiptar Samuel Tafçiu. Ngjarja tragjike ndodhi në ditën e parë të punës për të riun.
Autoritetet italiane kanë arrestuar 38-vjeçarin Punzo Pasquale, i dyshuar për lidhje me shpërthimin. Ai akuzohet për vrasje të trefishtë me dashje, posedim dhe prodhim të lëndëve plasëse dhe drejtimin e një grupi kriminal, akuza të cilat ai i ka mohuar.
Samuel Tafçiu jetonte në Ponticelli me partneren e tij 17-vjeçare dhe vajzën e tyre 4-muajshe. Partnerja e tij ka rrëfyer për mediat italiane se ata kishin planifikuar të martoheshin sapo ajo të mbushte 18 vjeç, ndërsa Samueli punonte për të siguruar një jetë më të mirë për familjen e tij.
Nëna e partneres së viktimës ka treguar gjithashtu se e kishte folur me Samuelin një orë para shpërthimit. Ajo ka shprehur dhimbjen për humbjen e dhëndrit dhe shqetësimin për të ardhmen e vajzës së saj dhe mbesës 4-muajshe.
Shpërthimi tragjik ka shkatërruar tre familje, duke përfshirë edhe dy gra të tjera, nënat e disa fëmijëve, që humbën jetën në këtë ngjarje.
