Presidenti i zgjedhur Donald Trump planifikon të vendosë një ndalim të përgjithshëm për personelin ushtarak transgjinor sapo të rifillojë mandatin e tij më 20 janar.
Sipas një raporti ekskluziv nga The Times, një nga urdhrat e tij të parë do të jetë nxjerrja e një urdhri ekzekutiv që largon personat transgjinorë nga të gjitha radhët e ushtrisë amerikane.
Urdhri pritet të hyjë në fuqi që në ditën e parë të rikthimit të Trump në Shtëpinë e Bardhë.
Rreth 15,000 pjesëtarë aktivë të ushtrisë amerikane identifikohen si transgjinorë. Sipas planeve të raportuara, ata do të largohen me anë të shkarkimit mjekësor, duke u shpallur të papërshtatshëm për shërbim. Në vitin 2021, kur ndalimi i parë i Trump u shfuqizua, rreth 2200 ushtarakë ishin diagnostikuar me disfori gjinore.
Trump ka kritikuar praktikat “woke” në ushtri, duke përfshirë diversitetin dhe përfshirjen, ndërsa në mitingjet e tij ka folur kundër asaj që ai e quan “fanatizmi transgjinor.”
Zëdhënësja e tranzicionit Trump-Vance, Karoline Leavitt, ka mohuar raportet, duke thënë: “Asnjë vendim nuk është marrë ende dhe asnjë politikë nuk duhet konsideruar zyrtare pa një deklaratë nga Presidenti Trump ose përfaqësuesit e tij të autorizuar.”
