Presidenti Vladimir Putin ka deklaruar se Rusia do të vazhdojë testimin e raketës së saj të re hipersonike, Oreshnik, në kushte lufte. Putin theksoi se raketa është "e pakapshme" nga çdo sistem aktual mbrojtjeje.
Kjo deklaratë vjen pas sulmit të parë me këtë raketë në Ukrainë, një veprim që Putin e justifikoi si përgjigje ndaj përdorimit të raketave amerikane dhe britanike nga Ukraina kundër Rusisë.
Raketa Oreshnik, e cila u përdor për herë të parë të enjten, u përshkrua nga Putin si një "test i suksesshëm". Raketa ka një rreze veprimi prej 3000-5500 km dhe mund të godasë objektiva kudo në Europë dhe deri në pjesën perëndimore të Shteteve të Bashkuara.
Karakteristika unike e saj është aftësia për të mbajtur disa koka luftarake që mund të godasin objektiva të ndryshëm njëkohësisht.
Kreu i Forcave Strategjike të Raketave Ruse, gjenerali Sergei Karakayev, tha se Oreshnik mund të pajiset me koka luftarake bërthamore ose konvencionale, duke nënvizuar se përdorimi masiv i saj mund të ketë efekt të krahasueshëm me armët bërthamore.
Një zyrtar amerikan tha se raketa është ende eksperimentale dhe Rusia ka një numër të kufizuar të tyre, duke theksuar se kjo nuk është një armë që Rusia mund ta përdorë rregullisht në fushëbetejë.
Presidenti ukrainas, Volodymyr Zelenskiy, e quajti këtë një "përshkallëzim të qartë dhe të rëndë" të luftës dhe kërkoi dënim të fortë nga ndërkombëtarët. Ndërkohë, Moska e cilësoi lëshimin e Oreshnik si një paralajmërim ndaj Perëndimit për të mos ndërmarrë "veprime të pamatura" në mbështetje të Ukrainës.
