Gjykata Ndërkombëtare e Krimeve të Luftës në Hagë (ICC) ka lëshuar urdhër-arrest për kryeministrin izraelit Benjamin Netanyahu, ish-ministrin e tij të Mbrojtjes Yoav Gallant, si dhe për liderin e Hamasit, Ibrahim Al-Masri, të cilët akuzohen për krime lufte dhe krime kundër njerëzimit gjatë konfliktit në Gazë.
Gjykatësit e ICC-së theksuan se kishte prova të mjaftueshme për të besuar se Netanyahu dhe Gallant ishin përgjegjës për veprime që përfshijnë vrasje, persekutim dhe përdorimin e urisë si armë lufte, si pjesë e një "sulmi të gjerë dhe sistematik kundër popullsisë civile të Gazës".
Ata gjithashtu nënvizuan se bllokada e Gazës dhe mungesa e ushqimit, ujit, energjisë dhe shërbimit shëndetësor kishin krijuar kushte që sollën shkatërrimin një pjese të popullsisë civile, duke shkaktuar vdekje për shkak të kequshqyerjes dhe dehidratimit.
Ky vendim ka shkaktuar zemërim në Izrael, i cili e ka cilësuar si të turpshëm dhe absurd. Ndërkohë, banorët e Gazës kanë shprehur shpresë se ky vendim do të ndihmojë në sjelljen para drejtësisë të atyre që janë përgjegjës për krimet e luftës. Hamas e ka mirëpritur këtë vendim, duke e cilësuar si një hap të parë drejt drejtësisë.
Urdhri për Al-Masrin përfshin akuzat për vrasje masive gjatë sulmeve të 7 tetorit 2023, të cilat shpërthyen luftën në Gazë, si dhe akuza për përdhunim dhe pengmarrje.
Izraeli ka refuzuar juridiksionin e gjykatës dhe ka mohuar akuzat për krime lufte. Po ashtu, Shtetet e Bashkuara, aleati kryesor diplomatik i Izraelit dhe një shtet që nuk është anëtar i ICC-së, ka shprehur shqetësim për këtë vendim dhe ka thënë se "thellësisht e refuzon" këtë nismë.
Ky është një moment i rëndësishëm në historinë e ICC-së dhe do të ketë ndikim të gjerë në politikën ndërkombëtare, pasi të gjithë janë të ftuar të respektojnë vendimet e gjykatës, pavarësisht dallimeve të tyre politike.
