Është zbardhur deklarata e 13-vjeçarit nga Bilishti i Korçës, që iu gjet një mjet prerës në çantë.
Një 13-vjeçar në Devoll ka deklaruar para policisë se nuk kishte qëllime të këqija dhe e kishte harruar biçakun në çantë pa dashje, pasi një ditë më parë kishte luajtur me të në shtëpi. Ai është përshkruar nga mësuesit dhe psikologët si një djalë i qetë dhe me sjellje të mirë, pa precedentë konflikti.
Ngjarja u zbulua gjatë kontrolleve të policisë në shkolla, të cilat janë intensifikuar pas disa incidenteve të ngjashme në qarkun e Korçës. Biçaku u gjet në çantën e nxënësit në një shkollë 9-vjeçare.
Njoftimi i policisë:
Ditën e sotme, në bazë të informacionit të marrë nga një mësuese dhe nga ndihmësspecialisti i zonës, se në një shkollë 9-vjeçare në rrethin e Devollit, një nxënës 13 vjeç mbante në çantë, një mjet prerës (biçak), menjëherë mësuesja, në prani të psikologes dhe stafit drejtues të shkollës, ka kryer kontroll në çantën e 13-vjeçarit.
Nga kontrolli i çantës u gjet mjeti prerës (biçak), i cili u sekuestrua në cilësinë e provës materiale nga specialistët për Hetimin e Krimeve të Komisariatit të Policisë Devoll.
Nxënësi, i cili nuk ka shfaqur më parë probleme në sjellje në shkollë, është duke u pyetur në prani të prindit, psikologut dhe punonjësit social të shkollës, nga specialisti për Hetimin e Krimeve i Komisariatit të Policisë Devoll. Të gjitha veprimet po kryhen në drejtimin e prokurorit.
