Një lajm i trishtë ka mbërritur në redaksinë e JOQ Albania nga Zallbastari në kryeqytet, ku është ndarë në mënyrë të parakohshme nga jeta mësuesja e shkollës së fshatit.
Mësuese Matilda humbi betejën me një sëmundje të pashërueshme, duke lënë pas një boshllëk të thellë dhe dhimbje të madhe në komunitetin shkollor.
Nxënës dhe kolegë të mësueses kanë shkrojtur në nderim të saj një mesazh prekës, përmes të cilit ata kujtojnë kujtojnë energjinë, buzëqeshjen dhe shpirtin e saj të pashembullt që frymëzonte dhe mbështeste të gjithë ata që e rrethonin.
Mesazhi prekës nga kolegët dhe nxënësit e mësueses së ndjerë:
"Me dhimbje të thellë dhe zemër të thyer, po shkruaj këto fjalë për të nderuar dhe kujtuar shoqen dhe kolegen tonë të dashur, Matildën, e cila na la shumë herët, në moshë të re, duke luftuar me një sëmundje të pasherueshme.
Matilda ishte një person i jashtëzakonshëm, plot energji, dashuri dhe një shpirt të pashembullt. Ajo jo vetëm që ishte një kolege e shkëlqyer, por edhe një shoqe e vërtetë, që gjithmonë na mbështeste dhe na ndihmonte me buzëqeshjen e saj të sinqertë dhe zemrën e madhe. Ajo do të mbahet mend për optimizmin dhe forcën e saj, për aftësinë që kishte të frymëzonte të tjerët dhe për mirësinë që shprehte në çdo moment të jetës.
Për ne, ajo nuk ishte thjesht një kolege, por një shoqe që na bëri të ndiheshim të plotësuar dhe të mbështetur, dhe humbja e saj është një boshllëk i paimagjinueshëm. Megjithatë, kujtimet që na la do të na shoqërojnë gjithmonë dhe do të jenë një burim frymëzimi për të vazhduar të nderojmë atë që ajo përfaqësonte: pasionin për jetën dhe dashurinë për njerëzit që kishte rreth vetes. Matilda, do të të mbajmë gjithmonë në zemrat tona. U prehsh në paqe dhe do të na mungosh pafund!
Nga shoqet e tua të Fakultetit që kurrë nuk do të të harrojne dhe nxënësit e shkollës, Zallbastar."
Stafi i JOQ Albania i shpreh ngushëllimet më të sinqerta familjarëve, nxënësve, kolegëve dhe të njohurve të mësueses së ndjerë.
