Një video terrorizuese ka tronditur banorët e Gjirokastrës këtë mëngjes, pasi dukej një grua që u drejtonte thikën qytetarëve dhe i kërcënonte t’i jepnin para.
Videoja, e publikuar nga “JOQ”, ka sjellë reagimin e menjëhershëm të autoriteteve.
Policia e Gjirokastrës ka njoftuar se menjëherë pas marrjes së informacionit, ka arrestuar Z.V., 43 vjeçe, e cila dyshohet se vuan nga probleme të shëndetit mendor.
Incidenti me kanosjen me thikë ndaj qytetarëve ka përshkallëzuar në stacionin e autobusëve në fshatin Lazarat, ku gruaja ka lënduar me mjetin e ftohtë një grua 67-vjeçare, duke e detyruar t’i jepte para.
Pas kryerjes së veprimeve procedurale, 43-vjeçarja u arrestua për veprën penale “Vjedhja me dhunë”, e mbetur në tentativë.
NJOFTIMI
Në lidhje me një video të publikuar paraditen e sotme, në portalin "JOQ", në të cilën shfaqet një shtetase që kërcënon me thikë qytetarët dhe iu kërkon para, ju informojmë se:
Shërbimet e Drejtorisë Vendore të Policisë Gjirokastër, menjëherë pas marrjes së njoftimit për rastin, shoqëruan në ambientet e Policisë, shtetasen Z. V., 43 vjeçe, e cila dyshohet se vuan nga probleme të shëndetit mendor.
Në vijim të veprimeve procedurale u bë arrestimi i 43-vjeçares, për veprën penale "Vjedhja me dhunë", mbetur në tentativë. Ditën e sotme, në stacionin e autobusëve në fshatin Lazarat, ka dëmtuar lehtë me mjet prerës, një 67-vjeçare, që ajo t’i jepte para.
Drejtoria Vendore e Policisë Gjirokastër falënderon dhe fton mediat e qytetarët që të denoncojnë rastet e paligjshmërive në çdo formë të shfaqjes së tyre, në numrin 112, duke iu garantuar reagim të menjëhershëm.
