24 orët e fundit në vend kanë qenë të ngjeshura me lajme tronditëse e tragjike, aksidente, vrasje dhe atentate.
Në orët e para të mëngjesit të ditës së djeshme, në afërsi të Sukthit 19-vjeçari Sabri Kreka humbi jetën në një aksident tragjik.
I riu ishte duke udhëtuar drejt Tiranës, kur në rrethana ende të paqarta humbi drejtimin e mjetit me të cilin po lëvizte dhe doli jashtë rrugës duke shkulur barrierat mbrojtëse të saj.
Përplasja ishte tepër e fortë dhe 19-vjeçari humbi jetën direkt në vendngjarje.
Ditën e sotme, Sabriu do festonte 20-vjetorin e lindjes. Ai ishte student në Universitetin Politeknik të Tiranës, viti i dytë, dega inxhinieri elektrike-energjitike.
Për t'i dhënë lamtumirën e fundit por edhe 'uruar' ditëlindjen, shokët e klasës kanë ndezur qirinj me balona në shkallët e universitetit dhe kanë plasur fishekzjarre në mesnatë.
