Janë zbardhur detaje të reja lidhur me ngjarjen tragjike të mesditës së sotme, ku mbeti i vdekur një 14-vjeçar dhe u plagos një tjetër.
Ngjarja ndodhi në një rrugicë, rreth 150 metra larg shkollës "Fan S. Noli" rreth orës 13:10, pasi kishin mbaruar mësimin, ku autori dhe dy shokët e tij nga një shkollë nga Sauku, zunë në pritë viktimën, pasi ishin konfliktuar më herët në rrjetet sociale për motive banale.
Pamjet e kamerave të sigurisë, të sekuestruara nga policia, tregojnë se gjithçka ndodhi në rreth 1 minutë e gjysmë, ku viktima dhe i plagosuri u sulmuan fillimisht me grushte dhe më pas u goditën me thikë nga tre bashkëmoshatarë.
Autori e goditi disa herë në zemër dhe në bark Martin Canin dhe shokun Canit, Luis Meçjan, teksa ky i fundit ndodhet në spitalin e Traumës në gjendje stabël. Po ashtu, edhe vetë autori ka mbatur i plagosur në krah.
Mësohet se e ëma e viktimës ndodhej në punë në momentin kur e ka marrë mësuesja në telefon dhe i ka treguar se po i çonte të birin në spital. 14-vjeçari Martin Cami u dërgua nga kalimtarët e rastit në spitalin e Traumës, por fatkeqësisht, nuk arriti t’u mbijetonte dot plagëve të marra dhe ndërroi jetë.
Burime bëjnë me dije se 14-vjeçari Martin Cani dhe autori i krimit luanin bashkë tek ekipi i Dinamos U-15. Në momentin e krimit nuk ka patur asnjë efektiv Policie në ambientet rreth shkollës “Fan Noli”.
Ndërsa një nga dëshmitaret tregoi se e pa ngjarjen, por nuk ndërhyu, ndërsa shtoi se nëse do të kishte roje te dera e shkollës, ngjarja do të ishte parandaluar.
“E pamë ngjarjen, por nuk ndërhymë. Ndërhynë ca të tjerë, ça do ndërhynim më? Jam e mërzitur dhe e stresuar. Po më bie të fikët për vete.
Po të ishte polici te dera e shkollës nuk do kishte ndodhur ngjarja, më vjen keq, nuk e di çfarë të them. Po të ishte ai, po të kishte një mësuese ia kishte dhënë ndihmën e shpejtë."
Njëri nga të miturit humbi jetën për shkak të plagëve, ndërsa tjetri është në gjendje stabël. Banorët kanë dëshmuar se ambulanca u vonua rreth 20 minuta.. Viktima dhe i plagosuri ishin nxënës të shkollës "Fan S. Noli", ndërsa tre autorët e dyshuar nuk ishin pjesë e saj.
